I+G PROIEKTUAK – HAZITEK PROGRAMA. N0WASTE: Elikagaien hondakinen murrizketa eta balorizazioa

07/03/2024

ONDOAN da N0Waste garatzen ari den enpresa-partzuergoko burua. Berrikuntza-proiektu horrek elikagai-produktu fresko eta galkorren hornidura-katean sortutako hondakinak murrizteko eta balorizatzeko teknologia berrien aplikazioa ikertzen du. ONDOAN zuzenean lantzen ari den helburuetako bat hondakin horien balorizazio-prozesuen ondoriozko biogasetik abiatuta balio handiko gas natural sintetikoa sortzea da.

Proiektuaren ardura duen partzuergoak nekazaritzako elikagaien sektoreko enpresak barne hartzen ditu, hala nola EROSKI eta Udapa, Barrenetxe (nekazaritza) eta Harakai-Urkaiko (abeltzaintza) kooperatiben laguntzarekin; baita enpresa teknologikoak eta ekipo-ondasunak ere, hala nola Lointek, Orloga, Izertis, SEGULA Technologies, Tecnipesa eta Plastigaur. Gainera, Zientzia, Teknologia eta Berrikuntzaren Euskal Sareko hiru eragile ditu: Tecnalia, Ceit eta BASQUE FOOD CLUSTER.

Erakunde horien lankidetzari esker, patata bezalako produktu freskoen banaketan gertatzen diren hondakinen arrazoiak aztertu eta hondakin hori balorizatzeko soluziorik onenak definitu ahal izan dira eta katearen kate-mailen arteko trazabilitatea eta konexioa ezarri. Proiektuaren azken zatia hondakinen balorizazioaren ondoriozko biogasa metano sintetiko bihurtzen saiatzea izango da. Horretarako, biogasa metanizatzeko behar den teknologia garatzen ari da, kanal anitzeko erreaktore katalitiko baten bidez. Erreaktore horretatik, industria- eta etxe-erabilerarako energia-iturri gisa erabili ahal izango den balio handiko gas natural sintetikoa lortzen da.

N0Waste, Espezializazio Adimenduneko RIS3 Euskadi Estrategiaren eta Industria Adimendunari buruzko Euskadi 2030 Zientzia, Teknologia eta Berrikuntza Planaren barruan dago. Proiektuak Eusko Jaurlaritzako Ekonomiaren Garapen eta Lehiakortasun Sailaren HAZITEK programaren finantzaketa du.