Airearen kalitatea Malaga-Costa del Sol aireportuko klimatizazio-instalazioan

13/05/2021

ONDOAN SERVICIOS enpresan konfiantza izan du Aenak, Málaga-Costa del Sol aireportuko klimatizazio-instalazioan airearen kalitatea erregulatzeko beharrezkoak diren mantentze-lanak egiteko. Horretarako, hainbat motatako jarduketak egin beharko dira, aireportuko aire girotuaren eta aireztapenaren sistema behar bezala garbitzeko eta desinfektatzeko.

Lehenik eta behin, klimatizazio-sistemen ebaluazio higienikoa egingo da UNE 100012 arauaren arabera (ikuskapen bisuala, mikrobiologikoa eta materia partikulatuarena), eta instalazioak garbitzeko eta desinfektatzeko eragiketak abiaraziko dira. Horren barruan sartzen dira makinak (klimatizagailuak, autonomoak, haizagailuak, erauzgailuak) eta hodien, sareten eta difusoreen sarea. Era berean, irekierak, tapak eta erregistro homologatuak gauzatzeko zerbitzua eskainiko da.

Malagako aireportuan egingo diren lanek terminaleko eraikin osoaren barruko ingurumen-kalitatearen ikuskapena ere barne hartuko dute, eta, bertan, gutxienez, 52 laginketa-puntu aurreikusten dira. Garbitzeko eta desinfektatzeko eragiketak UNE 100012 eta UNE 171330 araudiak bereziki kontuan hartuta eta errespetatuta egingo dira.

Azkenik, ONDOAN arduratuko da egindako zerbitzuaren laburpena, argazkiak, ziurtagiriak, analisiak eta tratatutako ekipoekin erlazionatutako dokumentazio grafikoa jasotzen dituzten txostenak egiteaz, eta baita oharrak eta iradokizunak egiteaz ere.